Aconcagua[1] (Hispanice Aconcagua) est mons in principali Andium cordillera,[2] montibus continuis in Mendoza, provincia Argentina, sita. Qui est altissimus mons in America, altissimus in America Australi, altissimus extra Asiam,[3] altissimusque in hemisphaeriis australi et occidentali. Cacumen 6961 metra super aequor maris est. Mons iacet 112 chiliometra ad septentriones et occidentem versus Mendozae, urbis et capitis provincialis, circiter quinque chiliometra a provincia Sancti Ioannis et quindecim fere chiliometra a finibus Tsiliensibus.[4] Mons est unus ex Septem Cacuminibus septem orbis terrarum continentium, ut vulgo appellantur.
Finitur Aconcagua a Valle Boum (Hispanice Valle de las Vacas) ad septentriones et orientem versus et a Valle Furcarum Inferiori (Valle de los Horcones Inferior) ad occidentem et australem versus. Mons et circumiecta naturalia sunt pars Saepti Provincialis Aconcaguae, ubi patent nonnulla glaciaria, quorum maximum est Glaciarium Montanum Furcarum Inferius (Ventisquero Horcones Inferior), circiter 10 chiliometra longum, quod ex facie australi usque ad 3600 fere metrorum altitudine descendit, prope castra Confluentiam (Confluencia).[5] Duae aliae glaciariorum rationes propinquae sunt Glaciarium Montanum Boum Australe (Ventisquero de las Vacas Sur) et Glaciarium Oriens / Glaciarium Montanum Hinituum (Glaciar Este / Ventisquero Relinchos), circiter 5 chiliometra longum. Notissimum autem glaciarium est Glaciarum Polonicum, in septentrionali et orientali montis facie iacens, quia usitatae ascensus viae prodest.