David Cameron

David Cameron

Res apud Vicidata repertae:

Nativitas: 9 Octobris 1966; Tyburnia
Patria: Britanniarum Regnum
Nomen nativum: David William Donald Cameron

Familia

Genitores: Ian Donald Cameron; Mary Fleur Mount
Coniunx: Samantha Cameron
Proles: Ivan Reginald Ian Cameron, Nancy Gwen Beatrice Cameron, Arthur Elwen Cameron, Florence Rose Endellion Cameron

David Cameron, denuo baro Cameron de Chipping Norton (vulgo plene David William Donald Cameron; natus Londinii die 9 Octobris 1966), vir publicus Britannicus factionis Conservativae, a die 11 Maii 2010 ad 13 Iulii 2016 munere primi ministri reginae Elisabethae II functus est.

David Cameron, in vico Peasemore comitatus Berceriensis educatus, fuit discipulus Collegii Etonensis. Philosophiae, politicae, oeconomiae in Collegio Aenei Nasi Universitatis Oxoniensis studuit, tutore Vernon Bogdanor. Ibi contubernalem habuit Catharina Fall; sodalis fuit societatis convivalis Bullingdon eodem tempore quo et Boris Johnson societatisque^(en) infamis ad honorem Petri Gaveston nominatae.^[1]

Pro factione Conservativa annis 1988-1994 operam dedit, consiliarius merens Normanno Lamont cancellario scaccarii et Michaële Howard civico rerum internarum secretario. Ab anno 2000 legatus est ad Parlamentum Britannicum pro circulo Witney comitatus Oxoniensis. Ductor electus est die 6 Decembris 2005 factionis Conservativae, propter quod officium eodem die dux oppositionis parlamentariae factus est. Factione Laboris (duce Gordono Brown) in comitiis anni 2010 aegre devicta, coalitione inter liberales (duce Nicolao Clegg) et conservativos composita, Cameron ab hoc anno primus minister meret.

Die 7 Maii 2015 David Cameron iterum electiones Parlamenti Britannici vicit et solus factionis conservativae suffragiorum gratia gubernare potest. Suffragio de Unionis Europaeae societate tenenda (quod ipse moverat) victus, die 24 Iunii 2016 se officium intra tres menses renuntiaturum nuntiavit; id quod citius fecit die 13 Iulii eiusdem anni, successore Theresa May. Primo ministro Rishi Sunak David Cameron minister rerum externarum Regni Britanniarum die 13 Novembris 2023 convocatus est.