Estados Unidos Mexicanos
Estados Unidos Meksikanos איסטאדוס אונידוס מיקסיקנוס
![]()
|
Meksiko[1] o los Estados Unidos Meksikanos es un paiz de Amerika del Norte. Al norte son los Estados Unidos, al sud topa kon la Repuvlika de Guatemala i el Belize, tiene una superfisia totala de 1,964,375 km² de territorio i es partajado en 32 entidades federalas yamadas estados. La kapital es la Sivdad de Meksiko; endemas es la sivdad mas grande del paiz, enjuntamente kon la su zona metropolitana, siendo una delas aglomerasiones mas grandes del Kontinente Amerikano i del olam.[2][3] Endemas el paiz es atopado entre el Oseano Pasifiko i el Oseano Atlantiko (a la beira del Golfo de Meksiko i dela Mar Karibeana); por la su posisyon jeografika, el paiz topa adentro de un area estratejika para la ekonomia. [4]
El paiz es una repuvlika federala, demokratika i representativa ande ay tres puederes de governo, el pueder ledjislativo ke apresenta la Kamara de Diputados i Senadores o Kongreso de la Union, el pueder djudisialo ke apresenta la Suprema Korte de Djustisia i el su shefe de estado ke es el prezidente del exekutivo.[5] La Konstitusion Politika de los Estados Unidos Meksikanos, son las leyes de esta nasyon soberana, ke apresenta la demokrasia del paiz basho las ordenansas de diritos i obligasiones para el nifus nasionalo i ajeno ke mora en el paiz.
En Meksiko ay una povlasion kontada de 119 530 753 moradores (senso del anyo 2015),[6] asegun las leyes del paiz, son meksikanos los hijos nasidos en otros paizes de sivdadanos meksikanos morantes en paizes ajenos. La mayoria delos meksikanos avlan kastilyano, es endemas, el paiz de mayor povlasion de avla kastilyana en el mundo,[7] tambien egzisten meksikanos ke avlan 63 linguas indijenas o nativas amerikanas, komo el nahuatl, maya, mixteko, zapoteko, otomi entre otras.[8]
Es una delas nasiones kon una grande rikesa kulturala i es puededora de una erensia istorika i artistika muncho antika ke la UNESCO deklaron Erensia Kulturala dela Umanitad.[9] Es un paiz kon muncha kultura orijinala i una fuerte infuensia iberika, por lo kualo es konsiderado enel mundo komo un paiz multikulturalo, multilingualo i multietniko, endemas de aver una grande biodiversidad en flora i favna, a kavza de klimas distintos en el territorio nasionalo.[10]
En Meksiko ay una ekonomia ekstremada, asegun los sus nivelos de vida son komparados a paizes komo Almania i Burundi adentro de un mismo territorio, las desigualdades entre meksikanos son bastante evidentes, [11] el desvelopamiento ekonomiko del Meksiko es paresido al desvelopamiento de Tailandia, Turkia, Indonesia o Sudafrika. Meksiko konta kon rikesas naturalas i mineralas komo petroleo, lo kualo es parte emportante del manadero dela su ekonomia, ansina tambien el desvelopamiento del turizmo por un klima bueno kon galanas i ermozas plajas, una rikesa istorika, kulturala i artistika.[12]