Detroit (pronunsiada /dɪˈtɹɔɪt/ en engles) es la site con la plu abitores en la stato Michigan de la SUA, la site la plu grande longo la borda entre la SUA e Canada, e es la seja de Wayne County. La nom es derivada de la franses: Détroit. En 2015, la cuantia de abitores de la munisipa de Detroit ia es sirca 677 116, donce lo ia es la 21 de la sites la plu poplada en la SUA. A sua grandia masima, la site ia ave 2 milion abitores. La urbe, conoseda como Metro Detroit, ave 4.3 milion abitores, donce lo es la du de la plu grande en la media ueste de la SUA, pos Chicago.
Detroit es un porto major a la Rio Detroit, un de la cuatro stretas major cual lia la sistem de Lagos Grande a la Via Maral Saint Lawrence. La Detroit Metropolitan Airport es un de la sentros de airocompania la plu importante en la SUA. La site de Detroit ancori la rejion economial la tre de la plu grande en la media ueste de la SUA, pos Chicago e Minneapolis, e es la 14 de la plu grande en la SUA. Detroit e la site visina canadian Windsor es liada par la Ambassador Bridge, la crusa internasional la plu ocupada en America Norde. Detroit es xef conoseda como la sentro de la industria esuan de auto; la "tre grande" de fabricores de auto General Motors, Ford e Chrysler ave sua xeferias en Metro Detroit.
Detroit ia es fundida a julio 24, 1701 par la esploror e aventuror franses Antoine de la Mothe Cadillac e un grupo de colonistes. En la sentenio 19, lo deveni un sentro importante de industria a la sentro de la rejion de Lagos Grande. Con la crese de la industria de auto en la temprana de la sentenio 20, la site e la suburbes de lo ia crese rapida, e en la desenio de 1940 la site ia deveni la cuatro de la plu grande en la pais. Par contrasta, par causa de restruturi, la perde de empleas en la industria de auto, e suburbani, Detroit ia perde un cuantia notable de abitores entre la sentenio 20 e oji. De cuando la popla de Detroit ia ateni un apico de 1.85 milion a la conta de abitores en 1950, lo ia declina par plu ca 60 persento. En 2013, Detroit ia deveni la site esuan la plu grande cual fili per bancarotia; lo ia sorti susedosa bancarotia en desembre 2014 cuando la governa de la site ia regania controla de la finansias de Detroit.
La cultur diversa de Detroit ave influe local e internasional, spesial en musica; la site ia es la loca de nase de la jeneros de Motown e tecno, e ia ave un rol importante en la developa de musica jaz, hiphop, roc e punc. La crese rapida pasada de Detroit ia lasa un colie global unica de monumentos arcitetal e locas istorial de la dui prima de la sentenio 20. De la desenio de 2000, laboras de conserva ia salva multe arciteta e ia capasi alga revives vasta, incluinte la restora de alga avenerias de diverti e teatros istorial, renovis de rascasielos, stadiones nova de sporte e un projeto de revive longo la rio. Plu resente, la cuantia de abitores de Downtown Detroit, Midtown Detroit e multe otra visinerias ia grandi. En 2015, Detroit ia es nomida la "Site de Desinia" par UNESCO; lo es la site esuan cual reseta prima esta identifia.
Lo ave un deta de $13 bilion (£9 bilion) e la governa nesesa usa medios sever.
Slogan: Speramos melior; resurget cineris. (latina per "Nos espera deveni plu bon; lo va asende de la senes").
Dirijor: Kevyn Orr (de 2. april 2013).