Un isola es un peso de tera cual es intera ensircada par acua. On ave tre spesies de isola: isolas continental, isolas de rios, e isolas volcanal. Alga isolas artifis esiste ance.
Isolas continental es corpos de tera liada par un borda continental a un continente, e esta modo es vera un parte de la continente. Esemplos inclui Grondland o Calalitnunat, Sisilia, Sumatra e Tasmania.
Un varia de isola continental – la isola microcontinental – es la resulta de la lasera de la continente. La esemplo la plu bon es Madagasicara.
Un otra suspesie de isolas continental es la isolas-paradores. Estas es formida par la cumula de arena sur la borda continental.
Isolas de rios aveni en la bocas de rios e en rios multe grande. Estas es causada par la reposa de deponeda en areas do la corente no es forte.
Isolas volcanal es construida par volcanes. Un spesie es trovada en un arco de isolas volcanal. Los developa do un plata de tera sumerji su un otra. Esemplos inclui la Isolas Mariana Norde e la Isolas Aleutian.
Un otra spesie de isola volcanal aveni cuando un lasera en la solo de la mar veni a la surfas. Un esemplo es Island.
Un spesie de isola volcanal final es un cual developa sur un punto calda. Un punto calda es causada par la move de platas. Un esemplo es la Isolas Hawaian.
Alga isolas es formida par la crese de coral sur un isola volcanal cual es sumerjida. Estas es comun en la forma de un anelo con un lagon en la media. Un esemplo es Bora Bora.