Anternete

La Anternete, tamien a las bezes chamada cumo "Anterneta", ye un tela de redes a la scala mundial de milhones de cumputadores lhigados uns als outros pul Protocolo de Anternete que premite l acesso a anformaçones i a todo l tipo de trasferéncia de dados. La Anternete ye la percipal de las nuobas tecnologies d'anformaçon i quemunicaçon (NTICs). Al cuntrário de l que normalmente se pensa, Anternete nun ye sinónimo de World Wide Web. Esta ye ua parte daqueilha, sendo la World Wide Web, qu'outeliza heipermédia na formaçon básica, un de ls muitos serbícios ouferecidos na Anternete. Cunsante dados de márcio de 2007, la Anternete ye ousada por 16,9% de la populaçon mundial (arrimado a 1,1 bilhon de pessonas).