L Quemunismo ye un sistema eiquenómico, bien cumo ua doutrina política i social, an que l oubjetibo ye la criaçon dua sociadade sin classes, baseada na proiadade quemun de l meios de porduçon, cula cunsequente aboliçon de la proiadade pribada. Segundo esta teorie, ne l quemunismo l Stado passarie a ser çnecessário i serie zaparecido, sendo sustituído por libre associaçones de pordutores.
L Quemunismo tenta oufrecer ua alternatiba als porblemas que son antendidos cumo de la eiquenomie capitalista i al legado de l amperialismo i de l nacionalismo. D'acordo cula eideologie quemunista, la forma para superar esses porblemas serie la derrocada de la rica burguesie, tenida cumo classe dominante, an fabor de la classe trabalhadeira - ó proletariado – para stabelecer ua sociadade pacífica, libre, sin classes, ó goberno.
L pensamiento quemunista ye normalmente cunsidrado parte dun mais ancho mobimento socialista, oureginário ne ls trabalhos de teóricos de la Reboluçon Andustrial i Reboluçon Francesa, que remóntan a las obras de Karl Marx. Las formas dominantes de l quemunismo, cumo l Leninismo, l Trotskismo i l Luxemburguismo, son baseadas ne l Marxismo; mas bersones nó-Marxistas de l quemunismo (cumo l Quemunismo Crestiano, i l Anarcocomunismo) tamien eisisten i stan crecendo an amportança, zde la Chimpa de la Ounion Sobiética.