Een neosassisme (of -saksisme) is een Saksisch woord vuur begrippen en vuurwarpen. Vake zint ze bedoold um wille met de sproake te hebben. Ze zölt dus nit gauw in officiële umstandigheden gebroekt worden. Een neosassisme kan worden bedacht vuur bestoande en nieje vuurwarpen.
Feitelik is een neosassisme etzelfde as een neologisme, met as verskil det een neologisme vake ne serieuze poging is um een leenwoord oet ne vrömde sproake te vervangen. Een neosassisme is bedoold um op lechthärtige wieze met de sproake te spöllen. Wat neosassismen köant ook grof bedoold wean.
Neosassismen bestoat meesttieds oet twee delen:
- Een warkwoord of begrip wat een kenmark van et vuurwarp beskrif
- 'n naam van een verölderd gerei wat etzelfde dool had as et nieje, of et soort materiaal woeras et vuurwarp van emaakt is.
Ne andere meugelikheid is um ne volledige vergelieking met een ander vuurwoarp te maken. Nen bosmeeier kan bievuurbeeld ne brom- of knetterzeise neumd worden, mer ook nen sik. Et vervangt ja de handedrevene zeise um hoog gewas met te meeien en duurdat der nen motor opzit maakt et dink kabaal. Tegelieke vervangt de bosmeeier 'n sik, den as in vroger tieden de kanten kort heul.
Neosassismen verskilt ook per strekke wier. Zo is een algemeen woord vuur stofzoeger ne huulbessem. In bievuurbeeld Riessen wörd et woord hulen nit gebroekt, dus veraanderd in blearbessem.