Nigeria

Nigeria, offisjeel de Federale Reppubliek Nigeria is ne federale groondwettelike republiek met 36 stoatn en et federale heuwdgebeed Abuja. Et laand lig in West-Afrika en hef greanzen met Benin in et westn, Tsjaad en Kameroen in et oostn en Niger in et noordn. Op et zuudn greanst et an den Guinesen Golf in den Atlantiesen Oseaan.

Op de stea wat non Nigeria is, warn vroger verskeaidene keuninkriekn. Et hudige Nigeria keump oet de Britse kolonisasie van disse strekke, an et eande van et 19de töt begin 20ste joarhoonderd. Nigeria wör saamn evoogd oet et Noordelike en Zudelike Nigeriaanse Beskoarmd Gebeed. De Britn zorgn vuur administratieve en wettelike instellingn, mer beheuldn de oolde stamnverbaandn. In 1960 köm Nigeria oonder eegn besteur, mer al noa eankele joarn onsteund doar nen börgeroorlog. Seend den tied hef Nigeria aait wesseld tusken demokraties ekeuzene börgerregearingn en militaire diktatuurn. In 2011 wördn de eerste redelik earlike en vrieje verkiezingn eheuldn.

Nigeria wörd vake n "Afrikaansen Reus" eneumd, vanweage de völle leu wat dr wont en redelik stabielen ekonomie. Dr wont 174 miljoen leu. Doarmet is et et drokste Afrikaanse laand en zeuwndedrokste laand van de wearld. Dr wont mear as 500 verskilnde volker. De grötste doarvan zeent de Hausa, Igbo en de Yoruba. Ongevear de helfte van de inwonners is Kristelik. Dee wont in et zuudn en middeln van et laand. Iets meender as de aandere helfte zeent Mohammedaann, dee as heuwdzakelik in et noordn en zuudwestn wont. De rest van de inwonners doot an tradisjonele en inheemse geleuwe, zo as et Igbo- en et Yorubageleuf.

Nigeria wörd vake zeen as nen regionaaln macht in Afrika. De Nigeriaanse ekonomie was in 2014 de grötste in Afrika. Met mear as $500 miljard gung Nigeria Zuud-Afrika vuurbie en wör et de 26ste grötste ekonomie van de wearld. Dr wörd emeand det Nigeria teegn 2050 bie de 20 grötste ekonomiejn van de wearld heurt.