Venezia

Venezia
by
Land	Italia
Region	Veneto
Provins	Venezia
Del av	Venice and its Lagoon, Storbyområdet Venezia, Triveneto
Areal	415,9 km²
Folketal	250 369  (1. januar 2023)
Borgarmeister	Luigi Brugnaro
Postnummer	30100
Retningsnummer	041
Venezia 45°26′23″N 12°19′55″E / 45.439722222222°N 12.331944444444°E / 45.439722222222; 12.331944444444
Wikimedia Commons: Venice

Venezia (venetiansk Venezsia, latin Venetia, tysk, dansk, svensk og historisk norsk: Venedig) er ein italiensk by som ligg inst i Adriahavet. Venezia er kjent for dei mange kanalane sine, arkitekturen sin og historia si. Han er hovudstad i provinsen Venezia i regionen Veneto og har om lag 270 000 innbyggjarar. I lag med Padova dannar han storbyområdet Padova-Venezia med om lag 1,6 millionar innbyggjarar. Venezia har vorte kalla «Dronninga av Adriahavet», «Vatnet sin by», «Bruene sin by» og «Lyset sin by».

Byen strekkjer seg over 117 små øyer i den myrlendte Venezialagunen og Adriahavet nordaust i Italia. Saltvasslagunen strekkjer seg langs kysten mellom munningen til elva Po (sør) og elva Piave i nord.

Rundt 60 000 bur i den historiske delen av byen (Centro storico); 176 000 i Terraferma (fastlandet), og 31 000 på andre øyar i lagunen.

Republikken Venezia var ein mektig maritim stat som varte i nesten tusen år. Han var utgangsposisjon for det fjerde krosstoget og eit viktig handelssenter (særleg silke, korn og krydder) og eit kunstsenter frå renessansen og fram til slutten av 1600-talet.

Nokre av de mest kjende landemerka i Venezia er Dogepalasset, Ponte dei Sospiri (‘Sukkebrua’), Markusplassen og Markuskatedralen. Ifylgje tradisjonen hyser Markuskatedralen leivningane etter evangelisten Markus, som er vernehelgen for byen, og evangelistsymbolet for han, løva med venger, er òg symbolet for byen og for den tidlegare Republikken Venezia.