Gravitacion

La gravitacion es una dei quatre interaccions fondamentalas que permèton a la fisica modèrna de descriure l'Univèrs. Es una proprietat universala de la matèria qu'es responsabla de l'atraccion deis objèctes massius entre elei. Dins la vida vidanta, se manifèsta per l'atraccion terrèstra que nos retèn au sòu, mai es a l'origina d'autrei fenomèns naturaus aisament observables coma lei marèias, leis orbitas dei planetas a l'entorn dau Soleu ò de la Luna a l'entorn de la Tèrra ò l'esfericitat dei planetas. D'un biais pus generau, l'estructura de l'Univèrs a granda escala es principalament determinada per la gravitacion.

La descripcion de la gravitacion ocupa una plaça centrala dins l'istòria de la fisica e fòrça teorias foguèron emesas. Uei, es lo modèl de la relativitat generala prepausat en 1915 per Albert Einstein qu'es lo pus satisfasent. Pasmens, coma es fòrça complèxe, la màger part dei scientifics e deis engenhaires preferisson utilizar la mecanica newtoniana, definida per Isaac Newton en 1687, qu'es pus simpla e que mena generalament a de resultats identics. A l'escala microscopica, la gravitacion es en revènge l'interaccion fondamentala pus febla e es negligibla dins leis estructuras atomicas onte predominan l'interaccion electromagnetica, la fòrça nucleara febla e la fòrça nucleara fòrta.