Jean-Paul Sartre

Nom de naissença	(fr) Jean-Paul Charles Aymard Sartre
Naissença	21 de junh de 1905, París
Decès	15 d'abrial de 1980, París
Ocupacion	escrivan, filosòf

Jean-Paul Sartre (París, lo 21 de junh de 1905, París, lo 15 d'abrial de 1980) foguèt un filosòf e escrivan francés, representant del corrent existencialist, dont l'òbra e la personalitat marquèron la vida intelectuala e politica francesa de 1945 entrò la fin dels ans 1970.

Escrivan prolific, fondator e director de la revista Les Temps modernes (1945), es conegut tant per l'òbra filosofica e literària coma per los engatjaments politics, d'en primièr ligat al Partit comunista, puèi amb los corrents esqueristas, al sens leninista del tèrme, especialament maoïsts, dins los ans 1970.

Intransigent e fisèl a las seunas idèas, rejetèt sempre los onors e tota forma de censura ; refusèt lo Prèmi Nobel de Literatura en 1964. Excepcion notabla, acceptèt pasmens lo títol de doctor honoris causa de l'Universitat de Jerusalèm en 1976.

Visquèt amb Simone de Beauvoir, filosòfa de l'existencialisme e feminista, amb la quala formèt un parèl famós del sègle XXen. Las lors filosofias e mai que fòrças pròchas, devon pas èsser confondudas. De 1949 entrò la mòrt, visquèt simultaneament una ligason amb Michelle Vian, primièra molhèr de Boris Vian, que picava los tèxtes a la maquina per la lor parucion dins la revista Les Temps modernes.