Ang Sungay ng Aprika ay isang malaking tangway at rehiyong heopolitikal sa Silangang Aprika.[1] Matatagpuan sa pinakasilangang bahagi ng kalupaang Aprika, ito ang ikaapat na pinakamalaking tangway sa mundo. Binubuo ito ng Somalya (kabilang dito ang Somalilandiya at Puntlandiya na de-paktong malaya), Hiboti, Etiyopiya, at Eritrea.[2][3] Bagama't hindi karaniwan, kasama sa mas malawak na kahulugan ang mga bahagi o lahat ng Kenya at Sudan.[4][5][6] Nailarawan ito bilang rehiyon na may kahalagahan sa heopolitika at estratehiya, dahil namamalagi ito sa katimugang hangganan ng Dagat Pula; umaabot ng daan-daang kilometro patungo sa Golpo ng Aden, Dagat-lagusan ng Guardafui, at Karagatang Indiyo, nakikibahagi rin ito ng hangganang-dagat sa Tangway ng Arabya.[7][8][9][10]
Ito ay sumasaklaw sa humigit-kumulang 2,000,000 km2 (770,000 sq mi) at pinaninirahan ng halos 115 milyong tao (Etiyopiya: 96.6 milyon, Somalya: 12.3 milyon, Eritrea 6.4 milyon, at Hiboti: 0.81 milyon).
↑Robert Stock, Africa South of the Sahara, Second Edition: A Geographical Interpretation [Aprika sa Timog ng Sahara, Ikalawang Edisyon: Isang Heograpikal na Interpretasyon] (sa wikang Ingles), (The Guilford Press; 2004), pa. 26
↑John I. Saeed, Somali – Bolyum 10 ng London Oriental and African language library, (J. Benjamins: 1999), pa. 250.
↑Sandra Fullerton Joireman, Institutional Change in the Horn of Africa [Institusyonal na Pagbabago sa Sungay ng Aprika] (sa wikang Ingles), (Universal-Publishers: 1997), pa.1: "Sumasaklaw ang Sungay ng Aprika sa mga bansang Etiyopiya, Eritrea, Djibouti, at Somalya. Magkatulad ang mga tao, wika, at mga heograpikal na katangian. (Isinalin mula sa Ingles)"