D Goldbärg-Wariazioone si e Wärk vom Johann Sebastian Bach (BWV 988), wo dr Bach sälber im Erstdruck us em Joor 1741 as Clavier Ubung bestehend in einer ARIA mit verschiedenen Verænderungen vors Clavicimbal mit 2 Manualen bezäichnet het.[1] Dr Naame Goldbärg häi si postum überchoo wäägen ere Anekdoote, ass si für e Johann Gottlieb Goldberg gschriibe worde sige, für dass dää si im Vorzimmer vom Hermann Carl vo Keiserlingk chönn spiile, wenn dä z Nacht nid chönn iischloofe.[2]
D Goldbärg-Wariazioone si e Höhepunkt in dr barocke Wariazioonskunst. S Wärk het e guet blaante Gsamtufbau mit Setz wo regelmäässig voorchömme und wo in de Oberstimme sträng kanonisch si. Dr inneri Zämmehang vo de Wariazioone underenander chunnt vom gmäinsame Bassthema. Jeede Äinzelsatz het si äignig Charakter. D Hauptdoonart isch G-Dur.