Mid Barriadas wean de bsondas in Rondlong vo de großn Städt in Peru liengdn Oarmenviadl bezeichnd. Es hondld se um informeje Siedlunga oda Slums, bei dena de Bewohna ned iwa legoin Grundbsitz vafing. Ähnliche Viadl in Brasilien wean Favelas gnennd.
Se bstehn im Wesntlichn aus ana Osommlung vo kloana Hittn, de znäxd aus Hoizobfäij, Stoff und Schrott baut wean, meisd on Steijhäng oda ondan schwaara z bsiedlndn Flächn. In spodan Ausbaustuafn entstenga donn richtige kloane Haisa aus Stoana, de im Laff vo de Joare oft aa vaputzd und gstrichn wean.
In Peru gibds meah ois 800 Barriadas, de heit euphemistisch Junge Siedlung (Pueblos Jovenes) gnennd wean. Meah ois zwoa Milliona Menschn lem in Lima in soichn Gebietn.